央視《華爾街》 達沃斯首映

【明報專訊】2010年達沃斯夏季論壇，9月13日至15日喺天津召開。今屆論壇有個特別嘅安排，就係開幕當晚舉行咗一個「中國之夜暨大型紀錄片《華爾街》首映禮」活動。由中央電視台同招商證券聯合製作嘅10集大型紀錄片華爾街，喺當晚舉行首映禮。

訪問各界猛人 分析歷史泡沫

據央視官方網站資料，華爾街係中央電視台首次採用高清格式製作嘅金融類特別節目，係繼《大國崛起》後，另一個大製作，總導演係曾擔任大國崛起導演嘅李成才，並邀請咗布朗大學等國際知名學者協助，而著名經濟學家吳敬璉及美國耶魯大學管理學院金融學終身教授陳志武，分別擔任學術總顧問和學術總指導。該片將於9月22日起，以每集50分鐘，喺央視財經頻道黃金時段播映。

紀錄片以華爾街歷次金融危機為主幹，梳理兩百多年來，現代金融發展嘅來龍去脈。外景攝製組前往紐約、華盛頓、洛杉磯、底特律、費城、芝加哥、達拉斯、斯托克頓，阿姆斯特丹、鹿特丹、倫敦等國際重要金融城市，分別採訪有代表性嘅金融家、學者、企業家、政治家等。小琴睇番啲宣傳片，訪問嘅對象包括華爾街首位女交易員繆麗爾．希伯特。大家有興趣，可以上以下網站睇睇：http://jingji.cntv.cn/special/hej/01/index.shtml。

報料電郵﹕piano@mingpao.com