強哥捐血550次 「捐到70歲」

【明報專訊】唔少人好似Emily咁，讀書時捐過血，但之後無乜恒心再去捐，Emily噚日去咗紅十字會嘅周年頒獎典禮，活動嘉許逾千名累積捐血次數達50次嘅「熱血人士」，其中捐血次數已達550次嘅退休警員李錦強，係本港捐血最高紀錄保持者。已經60歲嘅強哥話會繼續捐血，到年齡上限嘅70歲，直至不能再捐為止。


李錦強17歲開始捐血，家會每兩周捐一次「成分血（血液中嘅某一成分）」，令佢捐完又捐主要係因為佢覺得幫到有需要嘅人。而捐血達300次嘅女士黎靜嫺就覺得捐血有意義，雖然屋企人曾阻止，最後佢叫家人代佢出席捐血表揚活動，成功打動屋企人。


紅十字會代理行政及醫務總監李卓廣醫生解釋，成分捐血能捐到65歲，而捐全血則可到70歲，佢話因為人口老化問題，實際捐血嘅年輕人數目有所減少，呼籲大家無論任何年齡都要捐血。