劉浩龍「污糟手」論 發展局也抽水

【明報專訊】政府成日被網民「抽水」，家似乎學精咗，識得去抽番人水。話說歌手劉浩龍（師兄）日前發表「污糟手」論惹來網民炮轟及不停抽水改圖，噚日發展局都加入抽水行列，喺facebook上載身穿建造業工人衣服男人嘅雙手，乘機宣傳立法規管工程合約付款安排。發展局唔單止抽劉浩龍水，仲抽埋工聯會水，皆因有網民留言問「問過工聯會未？」，發展局就話「工聯會呢排應該好忙，無問喎」。


抽埋工聯會水 「呢排應該好忙」

發展局咁抽法，有網民話難怪抽到水塘都乾，所以要用咁貴嘅價錢去買東江水啦。


發展局上載咗工人一雙手嘅相，留言話「無法可修飾的一對手，建設香港永遠在背後」，仲叮嚀地盤大佬呢排天氣熱，要小心中暑，飲多啲水。


跟住該局「打蛇隨棍上」，指為咗保障工人「有汗出、有糧出」，建議制訂《建造業付款保障條例》，避免工人受拖糧之苦。