海洋公園誕港產袋鼠B

【明報專訊】海洋公園噚晚一次過公布喜事同白事，喜事係有新生命誕生，喺今年3月底正式同公眾會面、由南澳洲來港嘅雌性紅頸袋鼠Nano，誕下首隻喺本港出世嘅小袋鼠。


海洋公園話近期Nano開始舔育兒袋，且食慾大增體重上升，原來已經懷孕。小袋鼠健康成長，近期更開始喺育兒袋內眼仔碌碌咁望住周圍環境，充滿好奇心。


小袋鼠家體型好細，仲喺發育初期，海洋公園動物護理總監魏偉寶話，Nano舊年10月離開澳洲家鄉時無明顯懷孕迹象，而園方展區唯一嘅雄性紅頸袋鼠一早已絕育，因此Nano並非喺香港受孕，相信佢喺澳洲時，體內嘅胚胎延遲發育，等適應咗香港嘅環境後先繼續發育。園方預計小袋鼠將於9至10個月後先會離開育兒袋，但為免騷擾佢哋，園方仲未為小袋鼠詳細檢查，其性別有待確定。除咗袋鼠外，園方一條印度太平洋樽鼻海豚近期亦誕下小海豚。


不過園方噚日有「白事」，喺冰極天地嘅一隻斑海豹下晝兩點半意外死亡，園方正進一步調查。