澳洲工作假期 參加者跌2000

【明報專訊】近年唔少年輕人都趁30歲前離開香港，去外地參加工作假期，噚日勞福局引用同港府簽訂工作假期計劃協議10個國家政府提供嘅數字，見到過去一年至少有1.3萬名港青到9個國家體驗生活，當中最受歡迎嘅澳洲已佔咗近八成，足有過萬人，不過比前年人數就少咗成2000，反而其他國家，好似加拿大同韓國就有上升，舊年首次接受申請嘅英國就吸引成千人去「朝聖」。


僱主刻薄傳言影響前往意欲？

不時都周遊列國嘅「旅遊達人」項明生話，除咗選擇多咗，呢幾年澳洲有唔少傳言，講啲僱主對工作假期青年刻薄，或多或少影響港青前往意欲。


佢仲覺得家部分港青本土意識強烈，懷念英國管治時期，所以都吸引唔少青年「返祖家」。而韓國就受到韓劇《來自星星的你》等「韓流」帶動，「工作之餘，仲可以去追星都幾好」。