泛民踩單車反袋住先 傑哥推車

【明報專訊】官員坐開篷巴士落區宣傳政改，泛民就決定今個月24號踩單車落區宣傳反「袋住先」。呢個宣傳方式由熱愛運動嘅民主黨胡志偉建議。當日單車巡遊分兩條路線，分別由樂富去黃大仙，以及由黃大仙去觀塘。飯盒會召集人、公民黨梁家傑話公民黨會負責踩頭一段路，但自己唔夠膽喺馬路踩單車，所以當日唯有推車。除咗踩單車宣傳，嚟緊星期日泛民會到中環碼頭，向外國人宣傳政改。


準備10國語言「我要真普選」標語

傑哥話會準備10國語言嘅「我要真普選」同「向假普選說不」標語，包括德、法、日文等。傑哥仲話黨友毛孟靜已經搵咗好多少數族裔粉絲幫手翻譯，肯定唔會出錯畀人笑。


傑哥話，踩單車落區宣傳好有挑戰，但「踩馬路就唔好預我」。佢話推完車就會搭地鐵去終點等大家。至於其他唔識踩單車嘅泛民朋友，亦會喺終點見。