前主播轉行畫插畫 教保障私隱

【明報專訊】TVB新聞前主播郭詠嘉（Wingki）轉行做公關同插畫師，最近佢幫個人資料私隱專員公署創作咗一系列插畫，印成明信片派發，提醒市民要注意保障私隱。Wingki今次嘅創作手法包括電影二次創作、食字，內容圍繞電子資料私隱，包括小心行蹤、定期清理電腦Cookie（瀏覽網站之後留喺電腦嘅紀錄）、唔好立亂下載應用程式同埋拒絕騷擾電話4個主題。


友謊稱正上班 fb暴露真相

Wingki話自己係好注重保護私隱嘅人，有一次，有朋友向佢聲稱自己返緊工，但facebook顯示佢定位喺另一個地方，Wingki識穿對方講大話之餘，自己更加警惕，發布任何內容之前一定要思考下呢啲資訊適唔適合分享，佢又話自己每次分享相片前，一定要擘大眼睇清楚張相嘅背景有冇唔想畀人睇到嘅嘢。