港鐵沿線呎價圖熱爆

【明報專訊】「港鐵沿線物業呎價圖」最近喺網上熱傳，望住呢張圖，就可以睇清楚每個港鐵站嘅樓價概况。製作者中文大學社會及公民參與組主任梁啟智博士同Emily講，佢早幾日上網見紐約市曼哈頓租金地圖，受啟發之下，喺公餘時間用咗6個鐘頭做咗香港版本。


梁博士話，最難係要喺每個地區搵到「代表樓宇」，舊區就特別困難，因為唔會有一個屋苑支配一個地區，最有特色應該係舊樓，但係大家喺廣告潛移默化下，好多時反而對新樓盤更加有印象。


梁啟智﹕最難搵各區「代表樓宇」

梁博士最終決定用港鐵車站各出入口約200米範圍內，過去半年交易數量最多嘅屋苑做代表，按實用面積呎價計算，資料以4月25日中原數據公布為準。但點解會係200米呢？梁博士話，因彌敦道有幾個地鐵站，站與站之間相距約400米，為免會撞盤或者出現選擇困難，佢就以200米為界。


佢話，呢幅圖推出不過幾日，已經有90萬人接觸，出乎意料。有唔少網民指出錯處，如有錯別字，梁博士話，大窩口站揀錯咗縉庭山，按距離就應該選擇荃灣花園；有人建議應該繼續update圖表，甚至加入浮動指數，但梁博士擰頭，話呢啲係「公餘娛樂」，短期無興趣再做咁話。