呂麗君 辭任華置執董

【明報專訊】華人置業（0127）宣布，城中富豪、大股東「大劉」兩位紅顏知己之一嘅呂麗君辭任公司執行董事，為投放更多時間做「商業及慈善事務」。不過，同期加入董事局嘅另一位紅顏知己甘比（陳凱韻）家姐陳詩韻，就暫時無動靜，繼續做執行董事。


呂麗君同陳詩韻係2012年先後加入咗華置董事會，各自為「大劉」打理半壁江山，呂麗君負責內地事務，甘比嘅家姐陳詩韻，就負責香港嘅物業銷售出租。不過，自從「大劉」劉鑾雄舊年辭咗華置董事會職務，長子劉鳴煒擔正主席之後，據講佢同甘比關係密切，成為好朋友亦都好啱傾，唔知會唔會因為呢個原因，呂麗君獨自離開董事會呢？


又唔使太擔心嘅，就算不做董事，翻查資料，呂麗君仍然同劉鑾雄、劉鳴煒同為公司大股東，甘比同家姐喺大股東名單度就仍然睇唔到啦。


email: piano@mingpao.com

[小琴密語]