嶺大騷現粗口歌 藍鴻震：震驚亞洲

【明報專訊】嶺大學生會今個月17號舉行音樂會，邀請青年樂隊「血汗攻闖」獻唱，歌曲被指辱罵警察同有大量粗口，先後被多個團體批評，噚日就輪到「香港同新界事一樣關心」嘅「新界關注大聯盟」開記者會，話要強烈譴責事件、要求警方拘捕涉事者，同要求解散學生會。人稱「藍爺」嘅民政事務局前局長藍鴻震亦坐鎮記者會，仲話事件「震驚香港，震驚亞洲」。


何君堯指學生會無反省促解散

大聯盟發言人、律師會前會長、屯門鄉委會主席何君堯話，嶺大學生會擔當領導角色，但事後發出嘅聲明不但無認真反省，仲包庇樂隊，話校方唔理解音樂會嘅表達同原意；何君堯話學生會未能明辨是非，呼籲停止對學生會嘅資助，同要求校方解散學生會重組，否則建議政府引用《嶺南大學條例》整頓嶺大管理層。


何君堯喺記者會讀出涉事粗口歌嘅歌詞，話歌詞有攻擊性同威脅性，意圖激使他人破壞社會安寧，可以構成《公安條例》嘅「公眾地方擾亂秩序行為」罪，要求警方拘捕涉案者，大聯盟唔排除日內主動報警。不過，問到議員王國興前日喺《城市論壇》同樣叫人「收皮」，何就話收皮相對嚟講唔算粗口，只係「無咁幼細」。


嶺大學生會外務副會長柯凱齡話，之前喺聲明已向受影響人士致歉，相信警方會依據公平準則處理，至於學生會係咪無明辨是非，佢話社會自有公論。