廉政之友服務時數創新高

【明報專訊】廉政公署要喺地區推廣倡廉，除咗自己做吓短片、廣告等宣傳外，亦搵義工幫手搞吓地區活動。廉署噚日就舉辦「廉政之友」周年頒獎禮，嘉許約520名「廉政之友」義工，喺過去一年積極參與策劃、推廣倡廉活動，佢哋仲創下總服務時數達6400多個小時嘅新紀錄，比舊年多約600個小時。


廉政公署社區關係市民諮詢委員會主席梁智仁噚日喺頒獎禮上，讚賞每個廉政之友都係社區嘅廉政大使，喺生活、工作上都可以推動廉潔社會風氣，佢呼籲年輕人加入成為廉政之友，因為年輕人有無限創意同活力，可以喺相關活動上有更多貢獻。廉政之友係廉署喺1997年成立嘅義工組織，目前有超過1300名會員。