fb帖文：葡萄同事去旅行 政府新聞網被鬧爆

【明報專訊】政府新聞網早前開設facebook專頁，噚日出咗個帖文，話「小編」隔離位個靚女同事Shirley辭職同老公仔環遊世界，令到「小編」「葡萄（羨慕）到爆」。不過帖文一出，即刻畀網民鬧爆，唔少網民質疑政府新聞網發放呢啲同事八卦新聞有乜公眾利益。


有網民諗起之前「白宮發言人」、新聞統籌專員馮煒光被批評工作時間同記者喺facebook開火，當時佢解釋自己放工後5時09分先留言，於是就有人嘲笑政府新聞網嘅人「一定係17:09打呢個status喇」，仲有人起埋嗰位Shirley底。亦有自稱公務員嘅網民留言批評政府新聞網開工當去玩，以佢哋為恥。連好受年輕人歡迎嘅雜誌《100毛》都忍唔住抽水，話好「葡萄」政府新聞網嘅人，將專頁當自己facebook戶口咁用。


回應稱「唔想咁嚴肅」

面對批評，政府新聞網用晒網絡潮語回應，話「各位巴絲打，小編都係想輕鬆啲，同大家分享吓新聞網嘅編採動態，拉近啲距離，唔想成日咁嚴肅」。但網民唔係好收貨，質疑專頁嘅定位係咪發放政府最新資訊。