投訴非法倒泥 地署回覆激親人

【明報專訊】Emily早前收到行山友投訴，話西貢北丫碼頭懷疑有人非法傾倒泥頭同擺放鋼筋，向政府嘅1823熱線投訴，點知投訴咗近一個禮拜，地政總署透過1823覆番投訴人，話「本署已經接獲大量相同類型的查詢和投訴。惟資源所限，本署未能同一時間作出處理」。


睇到咁嘅回覆，投訴人激到紮紮跳，覺得當局漠視危險，「泥頭堆到高過碼頭欄杆，容乜易壓毁圍欄，係咪有人跌落海先會理？」其他行山友亦擔心建築物料跌落海會影響生態。


Emily問地政處，佢哋話早前喺1823覆完投訴人後，有再打電話講番會盡快安排實地視察同跟進。地政處人員到碼頭視察，已據相關條例喺建築材料張貼告示，飭令佔用人於限期內停止佔用政府土地，亦轉介部門跟進非法傾倒建築廢料問題；但投訴人早幾日行過，見泥頭仲未清。