長氣王國興「話人長氣」被罵

【明報專訊】政務司長林鄭月娥噚日上午去咗立法會講解政改，程序上議員可以做簡短嘅澄清提問，主席曾鈺成雖然勸告議員要發言簡短，但議員似乎唔係好聽話，好似工聯會王國興，自己發言時長篇大論講咗三分幾鐘，到咗長毛梁國雄有樣學樣，佢就向主席投訴長毛，結果換嚟主席教訓，鬧王國興首先做咗壞榜樣。


曾鈺成批做壞規矩

王國興發言時話，泛民拎住「╳」標語同埋穿著「╳」圖案tee，代表乜嘢呢？如果係學校，就代表成績差唔及格，所以話泛民議員係唔及格概議員。佢愈講愈長氣，曾主席已經多番提醒佢快啲問問題，而王國興最後都問林鄭，會唔會再安排佢呢啲及格嘅議員，同埋啲唔及格議員，去同中央官員溝通傾政改喎。


長毛之後拎住一件「馬屎」道具，比喻「馬屎憑官勢 政改累港人」，話要送畀林鄭，又話泛民否決政改，咁不如叫特首梁振英解散立法會，等重選時由選民作政改決定。


曾主席亦多番叫長毛唔好長篇大論，王國興亦加入投訴，但咁反令曾主席更激氣，反問王國興乜原來都知咁長氣係唔啱規矩咩？曾主席仲話王國興做壞榜樣，搞到王國興好無癮。