皓天趕「大時代」 抽水逾4億

【明報專訊】港股迎來大時代，四面八方熱錢湧港，就連首隻係本港上市嘅財經公關皓天財經（1260）都要抽水。皓天用「先舊後新」方式配售2億股，每股作價2.15至2.2元，比昨日收市價2.54元折讓13.4%至15.4%，今次最多籌集4.4億元。


折讓約15%

3年前上市嘅皓天，係本港唯一一隻「公關股」，出名做內地公司來港IPO生意，舊年萬達（3699）、中廣核（1816）上市，都被皓天搶到客。公司員工都係內地背景居多。


近年港股IPO市場暢旺，皓天自然賺錢多。公司派息都幾慷慨，中期末期業績，次次派埋特別息，派息比率超過五成。結果業績唔錯，今次都要乘熱打鐵配股。不過，皓天上市以來股價表現就一般般，直到近期順住牛市都大升六成，今次折讓15%，都仲有得賺啦。


[小琴密語]