footnote譯「註解」 ICT試卷惹投訴

【明報專訊】復活節假期過後，中學文憑試噚日繼續開考，有考生喺網上討論區鬧考評局，話噚日份資訊及通訊科技科（ICT）試卷一第8條多項選擇題，要考生選出圖中係用咗邊個文書功能。但有網民就覺得，4個選項無一個係正確答案，因為答案A「註解」唔可以當係「footnotes」，「註腳」先係最準確嘅譯法，又話令到唔少學生誤以為「索引」先係答案，呼籲考生集體電郵投訴。


不過，考評局就回應，將「footnote」翻譯作「註解」，係參考《資訊及通訊科技課程及評核指引》及《電腦教育—電腦科目常用詞彙》，又指如題目所示，考生應從提供選項中選擇最合適答案。多名資深中學電腦科教師都覺得，雖然「註解」未必係「footnotes」最準嘅翻譯，但「可以接受」。教過ICT嘅通識科教師方景樂又話，而且其餘3個答案「索引」、「縮排」同「置中對齊」明顯係錯，若考生揀咗，即表示連基本概念都搞唔清。