梁美芬搞基本法論壇 帶長者學習

【明報專訊】香港基本法教育協會、香港基本法及澳門基本法研究會噚日喺城市大學搞《基本法》研討會，研討會中段時，忽然見到近50個婆婆、大姨陸續到場，之後場內不時有千奇百怪電話鈴聲，包括有疑似粵曲鈴聲及走火警鈴聲，聽到台上講者都有啲意外。


Emily喺中段休息時問吓班婆婆點解對基本法咁有興趣，有婆婆話自己都係跟社區中心嚟，係立法會議員梁美芬帶佢嚟㗎喎，仲話得閒聽吓講座增長知識都係好事。至於聽完研討會有無下場活動呀？其中一個婆婆就同Emily呻話無，仲話自己要返屋企煮飯食。


本身係香港基本法教育協會會長嘅梁美芬就話，噚日有幾個地區中心組團嚟聽研討會，仲話推廣基本法無分年齡同階級喎。之不過，透過研討會學基本法，對班長者嚟講門檻好似高咗啲。