入行會違規？ 楊偉雄：唔講咁多

【明報專訊】早前獲梁振英委任為創新及科技諮詢委員會主席嘅行政會議成員楊偉雄，噚日出席一個青年論壇時話，創新及科技發展唔單止能夠提升香港嘅長遠競爭力，而且能夠推動青年向上流動，為香港年輕人提供就業機會。佢又叫青年以人為本，多關心社會，尊重各人唔同嘅觀點，唔好只係識站喺自己角度睇事情。


楊偉雄話，香港人口老化問題愈嚟愈嚴重，係全球頭10個「最老」地區之一，家香港嘅平均年齡中位數係43歲，中國大陸只有35歲，所以楊偉雄話青年嘅角色更加重要，要培養年輕人，畀佢哋發揮才能。佢喺論壇上同青年分享已故蘋果創辦人喬布斯嘅創業經驗，「只要有夢想，凡事可成真」。


對於有報道話楊偉雄擁有台灣居留權，唔符合《基本法》任命做行會成員嘅規定，喺台灣出生、美國接受教育嘅楊偉雄就話唔想講咁多，佢唯一國籍係中國，重申任命符合基本法。