中大水中月 靠工友落水拉船

【明報專訊】中文大學「博群花節」中未圓湖嘅水中月「月船」，早前畀網上博客質疑造型同俄羅斯藝術家Leonid Tishkov一系列叫Private Moon 嘅藝術品相似，主辦方本來已經喺網上回應，表明從未參考過呢系列作品，但呢件事原來仲有漣漪，有參與教授為設計者抱不平，原來「月船」喺未圓湖再現，經歷唔少思考同努力，有中大工友仲親自落水，將「月船」帶去臭臭嘅未圓湖中心，中大多一分浪漫，都靠佢哋一份心意。


有份參與佈置嘅中大新聞與傳播學院副教授朱順慈話，見到團隊被批評都覺得好難過，因為佢從頭到尾都有參與，知道水中月嘅概念完全係因應花節主題同校園環境發展。佢提到，幫手設計嘅同學都有啲唔開心，「箇中委屈同傷害，不言而喻」。


朱教授仲講咗段小插曲，原來設計者原本諗住將月亮背向獅子亭，最終工友覺得月亮應該面向獅子亭，設計者都唔再堅持，因為覺得落水「搏」嘅人係工友。佢希望，如果參觀者覺得水中月風景唔錯，就唔好忘記當中默默付出嘅人。