「區區咪嘥嘢」高峰會 林鄭畀功課黃錦星

【明報專訊】署理特首林鄭月娥除咗關注政改同扶貧政策，亦好重視環保政策，噚日佢出席環境運動委員會同環保署搞嘅「區區咪嘥嘢」高峰會，仲畀咗份功課環境局長黃錦星，就係要求黃錦星安排佢遲啲參觀沙田石門嘅「綠在沙田」項目，睇下呢個剛剛落成、年中正式啟用嘅環保教育項目搞成點。


噚日個高峰會喺會展舉行，區議會代表、地區組織同綠色團體代表有成200人出席。「第十三屆香港綠色學校獎」特設一個「咪嘥嘢校園減廢大獎」，得獎學校獲頒嘉許證書。出席者仲即場下載環保署推出嘅「咪嘥嘢」流動應用程式，可以好快搵到香港逾7000個回收點。


林太話，政府除咗研究適合香港嘅都市固體廢物收費制度，亦會喺今個立法年度提交廢電器電子產品生產者責任計劃立法建議，仲會進一步研究連飲品玻璃樽都有生產者責任計劃。環境局長黃錦星話，希望各區議會同社區團體一齊搞地區環保活動，打造綠色香港。