10專業人士 9個隨時願跳槽

【明報專訊】招聘公司翰德（Hudson）做咗份調查報告，比較香港、新加坡同內地嘅招聘同求職情况，結果顯示受訪嘅香港專業人士中，每10個就有9個對挖角跳槽持開放態度，而每10人中有8個人有CV（履歷表）喺手，隨時可以用。


呢份2015年嘅招聘報告，話訪問咗243個香港專業人士及企業招聘經理。調查話三地嘅受訪者，如果跳槽，首要考慮梗係加人工，回應比率分別係香港69％、中國66％，而新加坡受訪者睇錢因素最重，有75％話首要考慮薪金。其他考慮因素包括工作同生活平衡、職位升遷等。


有93％香港受訪專業人士又話，搵工會考慮公司嘅品牌，而唔少人都會諗吓，機構文化同自己係咪夾。


手機同資訊科技發達，家求職方式都多元化，有46％香港受訪者話，用手機提交求職資料係好重要嘅安排。