會武漢港生 梁振英：勿忘粵語

【明報專訊】特首梁振英（CY）經常強調，自己去親「內交」都會搵吓當地港人，正喺武漢訪問嘅佢噚日上午參觀武漢大學，亦有搵到嗰度嘅香港學生。中新社報道，有香港學生用「標準普通話」向CY介紹校園生活，但CY囑咐佢哋「不要忘記粵語和英語」。


中新社報道，目前約有200名香港學生就讀武漢大學。CY參觀學生宿舍時鼓勵學生「年輕人要多吃苦」，並喺女生寢室遇上學生用「標準普通話」主動介紹咗自己嘅校園生活，「讓梁振英連連稱讚」。


當CY準備離開時，一名香港學生拎咗自己創業設計嘅棒球衫送畀佢，CY仲即場換咗棒球衫。