回應成智言論 卿姐：黨內已傾政改廿次

【明報專訊】民主黨中委黃成智早前提出有條件「袋住先」嘅言論，被黨友許智峯高調投訴指違黨紀，黃成智前日話，唔記得中委有討論過否決8•31框架下嘅政改方案。啱啱去完賞櫻花返港嘅民主黨主席劉慧卿就話，黨內已傾過政改問題10次、20次，所以有黨友聽到黃成智言論時都嚇咗一跳。


卿姐話有唔同意見唔出奇，例如共產黨內都有好多唔同意見，強調黨友一定有言論自由，但就希望黨友按規矩做事，仲話希望大家開會討論、表決時出席，保證個人意見獲充分發揮。卿姐話民主黨中委會下周四會開會，希望媒體畀空間佢哋。


狄志遠欣賞黃成智勇氣

同樣係溫和派嘅民主黨狄志遠就話欣賞黃成智嘅勇氣，仲話自己曾WhatsApp提醒成智，佢作為中委會壓力大啲。


狄志遠仲自爆，噚日收到張文光短訊，叫佢唔好退黨。