工聯市集 財爺「美食車」係布景板

【明報專訊】工聯會噚日喺觀塘繞道天橋底搞咗一個市集，並邀請財政司長曾俊華去客串小販，拮魚蛋畀小朋友食，財爺仲有一架「美食車」"口添"呀！咦，睇真啲，架「車」原來係喺普通貨車車身整嘅布景板嚟嘅，魚蛋都係以傳統小販車推上嚟。財爺話，香港地方細，唔似外國啲美食車泊喺邊都得，仲有好多衛生同運輸嘅問題要研究。佢亦希望佢提倡嘅美食車構想將來唔止賣魚蛋，仲可以賣啲創意美食。
20攤檔 青年設計「被忽略者」系列
市集吸引咗約20個攤檔，賣嘅嘢包括有機蔬菜、曲奇餅同手作飾品等。賣有機菜嘅黃如榮就話，佢一半營業額都嚟自各處農墟，所以希望香港多啲墟市，話呢次活動只搞一日，時間太短，聚唔到人流，希望天橋底可長期同固定時間搞市集。
理工大學室內設計系畢業、24歲嘅鄒嘉豪（Dinno）都喺市集推銷自家設計產品，佢由自身經歷出發，設計咗一系列主題為「被忽略者」嘅帆布袋同明信片等，希望喚起對被忽略者嘅關注。其中一款袋係為之前喺港鐵撞死嘅唐狗「未雪」設計，Dinno話如果係人跌落路軌，港鐵就會救，但狗嘅生命就被忽視。
之所以創作呢一系列作品，Dinno話自己都係一個被忽視嘅人，中學時成績麻麻，冇乜長處，性格又唔開朗，一度自覺有自閉症，「曾經無端端喺條街喊」，直至讀設計之後先搵番自信。之後佢做義工時接觸到一啲獨居老人、家庭暴力受害人，所以希望以創作喚起社會對呢啲群體嘅關注。