搭國泰 飛機餐可以升呢

好多香港人鍾意外遊，但唔鍾意食飛機餐，只是為免捱餓，幾難食都要啃。國泰「一哥」朱國樑好明白香港人呢種心理，噚日佢同傳媒會面時話，今年年底國泰新的網上訂票系統啟用之後，乘客除可以網上劃位之外，仲可以預先upgrade自己嘅飛機餐。坐經濟客艙都可以訂商務艙嘅菜單，又或者係預訂支香檳到時在飛機上同另一半慶祝生日。但到底要加多錢，就要賣下關子。


經濟位加錢可享商務級菜式

查實而家訂飛時，已經可以講明自己要素食的飛機餐，但可以upgrade食有幾個course的商務艙飛機餐，就未有聽過。對國泰嚟講，呢個都係一個好方法提高收入。另外，朱國樑話，日後旅客亦可以訂飛時預先講明自己要帶多幾多Kilo行李，收費會比起到check in時因超標而額外收費較低。


7至8月送優惠吸海外旅客

港元隨美元匯價升值，令到香港人外遊意欲爆燈。但另一面卻是東南亞、歐洲、日韓的旅客減少來港消費，令到旅遊零售業叫苦連天。朱國樑話，國泰會喺今年7、8月，聯同旅遊發局一齊出招，吸引海外旅客來港旅遊消費，佢未有透露詳情，只係話海外旅客嚟到香港，可以參加大抽獎，仲有好多消費優惠。


財爺曾俊華早前份預算案，有提到撥8000萬畀旅發局，喺外地宣傳叫人來港旅遊。國泰佔咗香港航空市場近半，提供番啲優惠，幫自己之餘亦可以幫埋香港50萬靠旅遊消費搵食嘅打工仔。


[小琴密語]