德勤黎嘉恩強調非亞視人

【明報專訊】德勤中國華南區主管合伙人黎嘉恩（圖）噚日召開記者會，除咗交代亞視轉讓股權嘅消息外，仲喺記者會尾聲煞有介事話要主動澄清一件事。當記者以為有料爆，原來佢話，曾經有合伙人戴住代表德勤嘅襟章，畀市民問佢「係唔係喺亞視工作」，佢強調個標誌係代表德勤。唔通黎嘉恩預視到今次可能係最後一次就亞視股權事宜開記者會？


德勤係四大會計師行之一，早喺上年底亞視股東訴訟案當中，法庭裁定台灣旺旺集團主席蔡衍明一方勝訴，指主要投資者王征一直喺背後違規操控亞視，下令委任獨立監管人、即德勤進入亞視董事局檢核帳目，而黎嘉恩就成為德勤代表。


不過，Emily噚日左睇右睇，德勤嘅襟章其實係一個青綠色圓形標誌，同亞視台徽唔多似樣，而個標誌相信亦係德勤英文名「Deloitte」後面嘅一點。


（劉焌陶攝）