曾德成：有廣泛代表性

【明報專訊】立法會財務委員會繼續就住預算案開特別會議，噚日呢就輪到民政事務局長曾德成回覆議員嘅查詢。新民黨「田少」田北辰同教協葉建源就追問，可唔可以增加青年事務委員會嘅民主成分，例如話部分委員由青年人一人一票選出，不過曾德成就話新一屆嘅委員已經具有「廣泛代表性」。


問增民主成分 依然「研究緊」

家青年事務委員會嘅所有委員都係委任嘅。田二少話，自己都曾經喺特首答問大會向梁振英提出過同樣意見，當時梁振英話會「研究」，二少諗住問德成局長研究成點啦，點知德成局長就話，特首話「研究緊」，即係研究緊，答咗等於無答。


教協葉建源之後接力再追問德成局長，要求對方交代政府研究係咪已結束，幾經追問，德成局長話其實政府已經剛委任出新一屆青年事務委員會成員，任期兩年，而委員已有「廣泛代表性」。