肥胡回味同蓋茨食飯

【明報專訊】醫管局前主席胡定旭（肥胡）啱啱出席完博鰲論壇，佢笑嘻嘻同Emily講，喺博鰲佢同微軟創辦人蓋茨（Bill Gates）一齊食飯，成圍枱都係國際名人，包括日本前首相福田康夫，席間Bill Gates講咗好多關於未來科技嘅發展。


肥胡唔單止可以同Bill Gates食飯，仲成功引進香港先施錶行嘅資金，投資海南博鰲小樂島發展國際醫療旅遊目。呢個項目係國務院2013年批覆，設立海南博鰲醫療先行區。衛生計生委主任李斌去年帶肥胡到海南參觀後，叫佢幫手引入資金同人才。肥胡憑住做過醫管局主席嘅經驗，親自揸旗搞呢檔嘢。佢會出任海南千博樂城開發有限公司董事長，同埋先施錶行有限公司聯席主席。