民航處羅崇文3年外訪19次

【明報專訊】民航處最近成為議員炮轟焦點，近日議員向政府問及有關財政預算案嘅問題中，亦有唔少關於民航處。好似人民力量陳志全就問民航處長2012/13年度起嘅外訪數字，發現2012年至今年2月，民航處長羅崇文先後公務外訪19次，唔少係內地，亦有去加拿大、印度等，最貴一次係今年1月出訪加拿大蒙特利爾，出席國際民航組織第二屆高級別安全會議，共使咗約4.15萬元。


民建聯陳鑑林就問，民航處工作包括協調、分配航班服務等，咁過去5年，非天氣原因造成嘅延誤有幾多呢？不過民航處回覆就無分唔同原因延誤次數，只係列出過去5年離港延誤超過15分鐘嘅客運航班數目，當中2013/14年度延誤得最勁，約有4.8萬班次，佔全部離港航班31%。部分議員亦關注羅崇文人工，當局回覆指佢2015/16年度嘅年薪約264萬元。