鄧聲興跳槽君陽

【明報專訊】今個月初兩會帶動一眾環保新能源股落鑊炒起，其中君陽太陽能（0397）一個月內更已經急漲一倍。不過，查實呢隻太陽能股除咗有搞貸款業務之外，舊年10月仲收購咗本地券商樂基證券，改埋名做「君陽證券」，噚日仲宣布請嚟股壇名嘴，有「師奶殺手」之稱的鄧聲興，由李嘉誠旗下嘅尚乘過檔做君陽證券董事兼行政總裁，後日就會上任。


鄧聲興話，加盟原因係自由度大，而且公司啱啱起步，可以試下重新建立資產管理同企業融資等等業務，夠晒挑戰性，反觀尚乘嘅資產管理等業務家已經成熟。佢仲透露，尚乘都試過挽留他，「合作都好開心架嘛，同埋曾生（尚乘主席曾慶璘）好好人㗎，係個好好嘅老闆！」走咗都不忘讚兩句，抵你喺呢行撈咁耐！


睇番資料，原來鄧生一年前都推介過君陽太陽能㗎，咁佢第日仲敢唔敢推薦呢？佢就話未來睇吓有無敏感資料，先考慮推唔推喎。


email: piano@mingpao.com

[小琴密語]