只有1次 一哥外訪開支1.4萬

【明報專訊】社會上對警務處長「一哥」曾偉雄嘅評價都好兩極，佢任何動靜都好受人關注。Emily睇咗政府提交立法會財委會嘅文件，見到一哥於2014/15年度外訪次數大減至1次，共7人同行，開支用咗1.4萬元，比起佢2012/13及13/14年度分別外訪9次及3次、用咗83萬及33萬元，跌幅明顯。


處長臨退休 外訪均較少

究竟係因為一哥要專心留喺香港準備應付佔領運動、響應潮流節約，抑或係與兩年前被外界批評外訪次數及開支高昂有關，睇嚟都要留待議員喺立法會問問先至可以知道。不過，Emily就留意到每逢新處長上任嘅頭一兩年，外訪都會比較多，而臨退休嗰一年外訪都會比較少嘅。


唔知係咪受到湯顯明事件影響，截至2月底嘅2014/15年度，各大紀律部隊外訪開支都明顯減少，作為政府人數最多嘅第一大部門，警隊外訪開支為662.3萬元；其次係海關，用咗390萬元；第三位係消防處，用咗232萬元。外訪「慳錢」排行榜警隊「第一位」，佢哋較2013/14年度慳咗57.5％，其次嘅入境處慳咗39.6％，第三位海關就慳咗32.3％，消防就只慳咗7.4％。