學聯新莊常委遲到 賴周永康

【明報專訊】學聯後日（4月1日）換莊，候任嘅秘書處人員同常委噚日開記者會，交代周年大會內容同未來工作方針。新人事新作風，不過，睇嚟「遲到精神」可以繼續傳承落去——噚日因為有常委遲到，所以原定兩點半嘅記者會遲咗大約10分鐘開始，新莊成員笑言，有遲到習慣係因為現任秘書長周永康同副秘書長岑敖暉無以身作則搞成。


候任秘書長羅冠聰噚日準時現身，對於莊員遲到問題，佢話呢啲嘢要靠大家自律喎。咁有無諗過遲到罰款制，例如遲到10分鐘罰5蚊？候任副秘書長王瀚樑講笑話，搞罰款制嘅話，自己有可能罰到無錢。


笑言若罰款 或會罰到窮

王瀚樑話，學聯內部都有傾過遲到問題，建議由秘書處人員以身作則解決，即係未來秘書長同副秘書長都要準時出席，以樹立榜樣。身為現屆常委嘅王瀚樑仲話，自己遲到，係因為周永康同岑敖暉都無以身作則喎。