萬洲請食自家獅子頭

【明報專訊】平時去業績會，啲公司都會叫酒店安排啲小食畀記者同投資者，來來去去唔係蝦餃燒賣就係春卷三文治，之不過噚日萬洲國際（0288）呢間內地豬肉製品商派成績表就搞搞新意思，啲茶點全部都係用佢哋公司啲豬肉產品嚟整，除咗香腸、叉燒等等，仲整埋上湯獅子頭，順便可以做吓宣傳。


上市首份業績「靚仔」

話時話，萬洲國際上市後首份業績都算「靚仔」，核心純利賺成9.56億美元，升咗88%，最主要原因係佢哋用咗成71億美元收購嘅美國豬肉商Smithfield帶來巨大貢獻，唔怪得佢哋主席兼行政總裁萬隆可以口響話，當日啲人質疑佢哋買得貴，家證明係「錯得不能再錯」。不過咁，始終買完Smithfield後，公司仲揹住成身債，所以就算賺錢都冇得派錢，估計最快都要2016年投資者先至有息收。


[小琴密語]