港上市公司董事 女性佔11.3%

【明報專訊】民主黨主席劉慧卿早排去完德國訪問有感而發，要為女權發聲，話香港上市公司董事會女性董事比例低，叫政府諗吓會唔會諮詢公眾立法規定董事會嘅女性成員比例。財經事務及庫務局長陳家強就話，家1743間上市公司中，女性董事佔11.3％，但仍有38％公司董事會係全男班。


德國規定最少三成

陳家強噚日回覆卿姐時話，截至去年底，1743間上市公司董事會中，有1656名女董事及13,046男董事。陳家強話，相比2012年5月嘅10.3％統計，女性董事比例已經高咗。佢又話，港交所喺2012年諮詢過業界，話98％受訪者唔同意為女性董事指標設最低限制。


唔同地方有唔同做法，卿姐就話去德國考察，知道人哋啱啱通過法例，明年起規定上市公司監事會成員中，女性比例最少要有三成。


Emily就隨意睇吓本港一啲大公司嘅董事局，好似長和集團（0001）董事會有21人，當中4名係女性（19％），即高於本港平均數。新鴻基地產（0016）董事局有20人，女性只有1人。港府做大股東嘅港鐵，就有20名董事，當中女士佔5人。