梁：無要求叫大少小姐

【明報專訊】喺禮賓府服侍過兩任特首曾蔭權同梁振英嘅廚師鍾建良，前日喺《東周刊》報道，講到要叫梁振英個仔梁傳昕做「大少」、叫梁齊昕同梁頌昕做「小姐」；特首辦噚日就出咗個聲明，話叫「大少」同「小姐」嘅講法，「行政長官和夫人從來沒有這樣要求」，仲話搬入禮賓府前，屋企嘅海外女傭都只係叫3人個名。


話「二級家務員」非「總廚」

鍾建良喺訪問中話，自己係禮賓府總廚，特首辦個聲明就話佢喺2013年離開禮賓府時職位係二級家務員，並非總廚。Emily搵過資料，禮賓府有五級嘅家務員，其中二級家務員嘅職責係為特首、佢屋企人同埋貴賓煮食，仲要設計餐單同打點廚房日常工作。雖然人工唔算高，有兩萬幾蚊，但要求唔少，例如要有最少9年喺大戶家庭、大型飲食機構或酒店擔任中式廚師，具西式同東南亞菜式知識為佳。


網民問：本地家傭可直呼其名？

特首辦嘅聲明又話，梁振英同妻子梁唐青儀從來冇要求過鍾建良要用大少同小姐稱呼梁氏子女，以前嘅外傭都只係叫3人名字。不過有網民就質疑，外傭梗係唔會用中文叫大少同小姐啦，仲反問梁振英嘅本地家傭，係咪都係直叫3人名字呢。


支持梁振英嘅網上平台《港人講地》前日有分享《東周刊》篇報道，並冇提出質疑，至噚日特首辦出咗聲明後，港人講地就喺引述聲明時加句﹕「哦，原來真相其實係咁！」

《東周刊》噚晚就發聲明，話訪問引述鍾建良稱「他們吩咐叫大少和小姐」，而「他們」係泛指禮賓府相關人員，無話係特首梁振英夫婦。東周刊指有傳媒引述時「斷章取義，引起不必要誤會，本刊表示遺憾」。