卿姐：唔使回鄉證返到大陸

【明報專訊】沙頭角喺2012年起逐步縮細禁區範圍，但中英街同沙頭角墟仍屬禁區，要禁區紙先可以出入。Emily噚日跟立法會議員林大輝、陳婉嫻、劉慧卿同陳克勤去咗禁區考察，隨行嘅仲有保安局官員同北區區議員，總共行咗6個景點，包括被喻為「禁區中嘅禁區」中英街。


石碑為界 分隔中港

過百年前英國向中國租借新界時，就喺中英街分界，時至今日呢條街仍以幾塊石碑為界，一邊屬於香港，另一邊就係大陸，屬於大陸嗰邊仲插滿五星紅旗，好有特色。


議員去到中英街時特別興奮，可能因為部分泛民議員無回鄉證，民主黨主席劉慧卿隨即同其他議員企喺屬於大陸嗰邊影相留念，仲笑言「唔使回鄉證都返到大陸」，又話5、6年前嚟過中英街，覺得環境冇變喎。除咗議員不斷影相，中英街居民亦好雀躍，不斷同議員影相、打招呼，可惜噚日行程緊密，議員未行晒中英街就要走。