反三跑青年請願 CY叫「細聲啲」

【明報專訊】特首梁振英（CY）同財政司長曾俊華似乎都唔係好鍾意請願人士講嘢太大聲，曾俊華喺2010年曾對請願者講「多謝你咁大聲」，而CY噚日就叫反對興建機場第三條跑道嘅青年「細聲少少」，青年解釋話驚傳媒朋友聽唔到，CY即刻細細聲講「OK」然後轉身走，冇接到請願信。


青年拋陰司紙 警稱或追究

現場有人拍咗短片，上載咗喺「青年重奪未來」facebook專頁，片段中「青年重奪未來」成員講到唔少報告都質疑三跑工程嘅融資問題，當佢講到青年人都懷疑呢個方案時，CY突然用右手打手勢，話「細聲啲，細聲少少」，該成員就話「我驚傳媒朋友聽唔到」，點知CY即刻一句「OK」，然後掉頭走。


CY呢個舉動引起請願者起哄，有人拋陰司紙，結果警方向兩名分別係社會工作學生聯會同城大學生會嘅學生要求出示身分證登記，又警誡話保留追究權利。有「青年重奪未來」成員就同Emily講，拋陰司紙唔會傷害人，覺得警察靠嚇。