小樹熊曝光 太嘈會收埋

【明報專訊】嚟自南澳洲嘅3隻小樹熊終於曝光，今日起喺海洋公園「澳洲歷奇」展館同大家見面，小樹熊分別係兩女一男，全部啱啱滿兩歲，男嘅叫熙熙，女嘅分別叫美美同悠悠，同場仲有南澳洲嘅紅頸袋鼠同周圍飛嘅笑翠鳥，相當熱鬧。不過樹熊生性怕嘈、容易受壓，有壓力就會唔食嘢同好易病，所以海洋公園呼籲入場人士要安靜，仲會管制人流，但如果唔好彩有人太嘈吵，可能就要將樹熊抱入後勤基地，無得同市民見面喇。


Emily噚日參加「澳洲歷奇」展館預覽，搶先見到3隻小樹熊入面嘅兩隻，分別係悠悠同熙熙，美美就未登場，小樹熊每日要瞓覺18至20個鐘，市民入場見唔見到「清醒」嘅樹熊，都要碰吓運氣。


見「清醒」樹熊需碰運氣

海洋公園陸生動物部高級館長祝效忠（Howard）話，3隻小樹熊喺香港適應得唔錯，家有95%食糧係香港、廣州種嘅尤加利葉，剩低5%嚟自故鄉南澳洲嘅尤加利葉，相信未來一兩個月都可以戒斷。


小樹熊新陳代謝比較慢，有咩病痛未必會即時顯現，為咗確保佢哋健健康康，Howard話飼養員會每日觀察、仔細記錄佢哋進食分量同排泄情况，如果小樹熊唔食嘢、自己搵水飲或排便減少，都可能係生病徵狀，因為樹熊食尤加利葉時已經攝取水分，平時唔使飲水㗎。Howard亦都再次提醒樹熊天生怕嘈，所以工作人員會喺市民入場前、場內，一直提醒大家保持安靜。


小樹熊咁得意，海洋公園主席孔令成相信可以吸引到更多人流，佢話今個月頭3星期入場人次按年跌三成，但近一兩日有回升，相信新館都會有啲幫助。