霍公子踩兩場 記者會遲到

【明報專訊】相信唔少青年都希望創業做老闆，香港青年聯會、香港軟件行業協會、香港電腦商會，以及科技及餐飲協進會，聯合主辦「幫你做老闆——創業學習賽」，等大專生喺大型展覽中擺攤位，一嘗做老闆滋味。青聯主席霍啟剛噚日同傳媒茶敘介紹呢個活動，不過佢作為主角之一就遲咗幾分鐘先趕到，佢話因為之前有個體育活動要參加，啟剛自己都話，「真係好忙」。


創業學習賽係透過下月舉行嘅「香港數碼生活嘉年華」以及「添馬紅酒佳餚節」，為青年提供「做老闆」機會。參展商會為參賽嘅青年提供貨品，青年則規劃營銷、佈置展位，以及喺網上媒體宣傳，喺展期內扭盡六壬出售產品。創業學習賽邀請得新鴻基集團執行董事郭基煇、信和集團執行董事黃永光等富豪後代做評審。


商會供貨 青年諗計賣出

啟剛介紹活動時話，創業學習賽提供機會畀青年同業界人士交流，仲可以增加青年自信心、提升競爭力，為就業做準備。