放寬利申 泛民轉軚建制怒

【明報專訊】立法會噚日討論修改議事規則，放寬披露利益程序，建議如果會議討論事項，議員涉及嘅金錢利益係屬於全港全體或部分市民共同享有，就毋須披露，以及如果之前申報咗一次，就唔使每次發言都再申報，原本呢個議程無乜爭議，皆因議員個人利益監察委員會早前做過問卷，超過八成議員都表態支持。但結果噚日民主派投票時就轉軚反對，搞到成班建制派都幾嬲，最終亦因泛民反對而否決建議。


利益涉市民共享免披露建議被否決

唔少泛民議員發言時都表態反對，承認填問卷時無睇清楚，話家先覺得申報制度好寬鬆，唔應該再放寬喎。不過民主黨主席劉慧卿發言時，就提醒各議員要公道啲，佢話尊重議員睇法，但希望民主黨同其他議員，諮詢時都應用時間同精力提出意見，認為既然問卷有超過八成支持，批評改變立場嘅議員唔尊重議會。民建聯葉國謙更批評泛民突然改變立場係離譜。


不過，估唔到投票時，民主派只有李國麟同莫乃光支持原建議，其餘包括發言批評黨友嘅卿姐都轉軚投反對票。卿姐事後解釋，由於噚日朝早黨友胡志偉提出開緊急黨團，結果大家決定反對，所以仍都要跟隨投票，但佢強調唔同意最後一分鐘先改變主意，認為誠信係好緊要嘅。