政府民望低 累「三跑」捱轟

【明報專訊】日前除了齊昕「健康」被指有問題，引起全城關注外，行政會議同日通過興建「三跑」方案，由於最新造價驚人，達1415億元，惹來網民極大反彈。有老友之前跟進過呢壇大龍鳳，幫手做過好多游說工作，慨嘆三跑最終成為千夫所指，覺得非常可惜。為咗香港所謂的長遠發展，保持競爭力，筆者原則上也支持三跑，但今次只能怪政府民望低，加上機管局管理層經過一輪大地震，在快刀斬亂麻的處理方式下，結果就出事啦。


其實只要冷靜啲睇呢件事，呢個彈唔難拆，根本唔使搞到咁乞人憎。1415億元呢個數，較最初預算多50億，增加咗3.5%，但引起反應好似增加咗35%咁；最奇怪係，點解好似無人清楚解釋重估預算的原因？


無做好期望管理 嚇親納稅人

據老友了解，三跑涉及填海的地方，有污泥要處理，方案建議引入日本技術鑽挖污泥，令建造成本增加；另外，有工程師提醒，由於內地珠三角近年有多項大型工程進行，填料成本頓增，香港要同鄰近地區搶填料，計埋填料運輸成本，單係填海的成本，都貴過原來預算。


筆者唔係好明，點解「三跑」過行會前，唔處理吓啲技術問題，做吓期望管理，一出個數就嚇親市民；有消息就話，機管局換咗一班管理層，同政府最高領導好同聲同氣，只想快刀斬亂麻，令之前做的所有游說工作前功盡廢。


邊個撐政府 邊個當災

家機管局自己承擔建造費，被人批評繞過立法會，但原來背後係有多位經濟學家，建議機管局咁做，希望三跑早建早享受，不過家政府民望咁低，原本應該護航的專家，都唔敢出聲；同樣道理，本來搞掂晒一班政治朋友撐三跑，但家邊個撐政府邊個當災，個個唔敢出聲，連面對一些無理批評，都無人出來糾正；所以話，政府威信係好緊要，如此低民望，樣樣陀衰家，香港只會一事無成。


未用得先收錢 火都嚟

另一個令一般市民火都嚟的原因，就係融資方案，包括暫停向政府派息，建議以「用者自付」原則，向離境旅客收180元建設費。大佬呀，話明係「用者自付」，但都未有得用就收錢，真係當人家傻的嗎？機管局同政府咁多財務專家，要諗一個更合理的融資方案，應該唔難，點解會宣布一個最令人反感的選擇？


同情「三跑」 不如同情齊昕

不過咁，與其同情「三跑」，筆者真心同情齊昕，我哋無權干預人哋家事，但只想同梁特講一句：「個女係你㗎﹗」政府宣傳機器「港人講地」網站，圖文並茂說什麼可憐天下父母心，力銷梁特慈父形象，個焦點都係緊張梁特的形象，真係超錯-個女病咗，仲話係英國時已經有問題，咁即係早前成家人在英國海德公園影的溫情相，齊昕已經有情緒問題，但仲要被拿來做公關宣傳，究竟係邊個唔放過齊昕？作為人父，到底係自己的政治形象重要，定係女兒重要？還望梁特三思。


[應正亮 廿四味]