曾德成：唔好問我人事

【明報專訊】民政事務局政治助理徐英偉日前辭職，準備返「娘家」民建聯做總幹事，但嚟緊民政局有唔少政策要呈上立法會，民政局長曾德成噚日同傳媒茶敘時被問到會唔會唔夠人用，佢就話人手仲係「好齊全」，又話若有人「自動請纓」政治助理一職，仍樂意考慮。佢話呢個位任期只有兩年幾，係政治任命，要有做政治工作嘅興趣同決心，先能勝任。


有傳民建聯曾經推薦人選但不獲政府採納，曾德成話新人選有無政黨背景並唔重要，但承認有政黨背景係有少少優勢。


席間提到青年事務委員會同公民教育委員會嘅《基本法》教育工作，曾局長未入正題已叫記者「唔好問我人事」，先發制人。有記者直接問，華人置業主席劉鳴煒係咪將會出任青年事務委員會主席，局長亦唔肯評論，只提對方做過青年高峰會講者。


至於該局前常秘楊立門係咪會出任公民教育委員會主席呢？曾局長就話楊立門好似仲想唱歌喎！楊立門呢個「AO歌王」周一晚先開完「處男騷」，局長認真留意舊同事嘅去向。