陳智思fb提反家暴

【明報專訊】禮賓府噚日朝早成為焦點，一度傳出有人被打、自殺。咁啱行政會議成員陳智思（Bernard）下晝喺facebook留言，話上星期喺北京人大會議提出7項建議，其中一項係「關於反家暴法制定與實施」，有網民見到，就問陳智思唔通佢都去「抽水」？


向人大提7建議 與港無關

兩會已經結束，身兼港區人代嘅Bernard噚日突然喺fb話向人大提出咗7項建議，包括強化貧困地區弱勢群體支援政策工作，仲有一項係建議制訂反家暴法。


據知Bernard啱啱開完人大會議返港，先有時間叫同事幫佢post吓人大嘅工作，而各項建議全部都係講全國事務，與香港無關。


Bernard係樂施會成員，向人大提建議前，先搵樂施會北京辦嘅同事提供建議及資料。Bernard提交人大嘅文件指出，據內地調查，唔少婦女、兒童及老人家受到身體、心靈上嘅虐待，仲話全國婦聯研究表明，24％至30%婦女遭受家庭暴力，而大部分施暴者係男性。所以Bernard提出要由跨部門、多機構聯手處理家暴，仲要立法針對家暴罪行。