新亞售賣機半年派1200安全套

【明報專訊】「關懷愛滋」同中文大學新亞書院學生會合作，喺書院內自動售賣機放置安全套畀學生免費索取，藉以推廣安全性行為，半年派出逾1200個安全套。中大新亞書院學生會常務幹事鄧曉鋒話，希望可推廣至全中大校園同其他大專院校。


喺大學派安全套，有人撐亦有人反對，中大學生會會長王澄烽話，曾經有人以富宗教色彩嘅說話，喺民主牆批評派安全套係鼓吹淫蕩。


王澄烽就話，學生會支持派套，唔係鼓吹同學發生性行為，而係現實中呢種事「一定會有」，只係希望令同學要做都做得安全啲啫。佢又話，唔止新亞書院，其實中大其他地方嘅售賣機都有免費安全套，係橙色包裝嘅，同「關懷愛滋」嘅黑白色包裝唔同，唔知係由咩機構供應；學生會希望可以擴展到宿舍樓下都有得拎，而佢印象中，宿舍規矩冇列明唔可以喺宿舍範圍發生性行為。


「關懷愛滋」項目總監張曉華話，畀大學生容易取得安全套，係有效控制性病同愛滋病病毒傳播方法之一，截至2014年底，全台灣共有約10間大學設有安全套售賣機，仲配合一系列教育活動，佢希望香港可借鏡台灣，喺唔同院校繼續試行。