廠商會新會長籲長沙灣搞時裝周

【明報專訊】中華廠商聯合會（廠商會）管理層換屆後，噚日同傳媒午宴，新任會長李秀恒同Emily講，政府承諾撥款5億元支持本地時裝設計，不如拎幾千萬出嚟，喺製衣業集中嘅長沙灣包起一條街一個禮拜，搞個時裝周，每日安排靚女模特兒展示香港時裝，打造時裝批發中心，佢話呢啲建議，係同紡織及製衣界議員鍾國斌一齊諗出嚟。


副會長：「光復」日生意反而好

講開時裝，廠商會第一副會長陳淑玲就係做時裝生意，喺沙田新城市廣場有分店，而早排有示威者去商場搞「光復」，搞到好亂，但陳淑玲話估唔到嗰日生意反而幾好，原因係唔少人怕亂走咗入去店舖避風頭，而店舖落閘個幾鐘防止示威者衝入，結果唔少顧客焗住喺店內購物，等到外面平靜先走！

李秀恒就話，廠商會下月會率團去西安考察參觀，至於受市民歡迎嘅工展會，就會去內地唔同城市舉行，包括今年6月嘅天津工展會，未來希望將工展會帶到澳門及台灣。