浸大校友贊助 亞視節目講論語

【明報專訊】亞洲電視噚日舉行全新資訊節目《世說論語》試映會，由本月30日起、逢星期一至五播放，旨在宣揚《論語》嘅傳統中華文化。今次節目由浸大校友組織「尚志會」贊助、超藝理想文化學會製作，學會榮譽會長陳復生仲做埋節目主持，但無透露呢個過百集節目用咗幾多錢買下亞視嘅廣播時間。


節目逢星期一至五每晚10點25分喺亞視播放，每集大概2至3分鐘，透過邀請時政或企業嘅代表人物，講吓佢哋「為人處世嘅精神思想，令觀眾「深入淺出」了解《論語》名句嘅道理。


獲贈荷花畫 亞視自詡君子

浸大校長陳新滋、亞視執行董事葉家寶噚日出席放映會，而浸大饒宗頤國學院長陳致會做埋節目顧問；但浸大就話節目係由校友組織尚志會贊助，同大學無關。至於國學大師饒宗頤、學者何文匯就獻上一幅荷花書畫同題字，亞視話「荷花為花之君子」（但係Emily記得花之君子係蓮花喎），可以表揚葉家寶同佢帶領嘅亞視團隊有「君子」風範咁話。