CY禮賓府兩現身 同市民玩自拍

【明報專訊】噚日禮賓府開放日除咗吸引市民到場賞花，仲吸引唔少撐黃傘嘅示威者向特首梁振英（CY）表達訴求。朝早10點幾，CY同老婆梁唐青儀就短暫出嚟同市民握手，中途遇到有人高舉「我要真普選」揮春，之後逗留短短兩三分鐘就返入去，中間冇回應過記者提問。


CY個女梁齊昕就唔怕人多混亂，喺中午人多時間由禮賓府正門返屋企。之前齊昕話過傳媒往往喺佢冇打扮嘅時候追訪佢，扮靚靚現身就冇人影；佢噚日明顯有預備，化好晒妝現身，入到禮賓府上樓梯時仲同傳媒講拜拜。


其後CY喺5點幾人潮少啲時再「出巡」，喺大批傳媒追訪之下，警方築起兩道人牆，不過有CY支持者就成功走入人牆同佢影相。有女士隻手唔夠長揸手機自拍，CY就主動揸機，又同市民握手。不過當傳媒問佢點睇示威者訴求，佢就笑笑口一句都唔答，之後頭也不回急步行上樓梯返屋企。