導賞10多年 科學館七旬義工不言休

【明報專訊】香港人對科學館唔算陌生，但原來開館第二年，科學館就開始招募義工導賞員，有人仲一做多年，其中張恭永就做到70歲都仲做緊，佢話「年紀大咗，記憶力無可避免會衰退，做導賞員可以畀我溫故知新」。


科學館1991年啟用。張恭永相信老有所為，但必先要老有所學，加上唔想退休後同社會脫節，所以當年二話不說就報名參加成為科學館導賞員，一做十幾年。後生嘅時候，張恭永曾喺電報局負責為船主翻譯摩斯密碼，所以佢對電訊科技特別有興趣，最鍾意就係電訊廊展館，如果遇到啱嘴形嘅參觀者，一定雞啄唔斷。


基本資格須中七理科程度

張恭永話導賞員除咗要熟悉展品資料，最重要係有愛心、耐性和處變不驚，因為佢哋服務嘅對象由4歲稚子到兩鬢斑白嘅長者都有，而每逢有新專題展覽，佢哋呢班「先頭部隊」都係最快掌握資訊嘅。


科學館家有163人個導賞員，主要幫手向市民介紹展品，解釋背後科學原理，當中有唔少係家庭主婦或退休人士。呢班導賞員現正為科學節一個專為「老友記」而設嘅科學實驗班做籌備及培訓工作，相信到時一班長者亦可以老有所學。而成為科學館導賞員嘅基本條件係年滿18歲，修畢中七理科課程，能操流利中英語。