網民惡搞 滴滴拉屎值百億美金

【明報專訊】呢幾年各類搭車、食飯、睇戲Apps大行其道，簡直到咗咩都可以用App搞掂嘅地步，有內地網民最近就發明咗個叫「滴滴拉屎」嘅App，呢幾日仲愈傳愈hit，話有天使基金有興趣投資，估值仲去到成100億美金，認真係滴出「黃金」。


搵廁所係生活必需

查實呢個只係網民惡搞，不過佢哋又搞得幾認真，呢個「滴滴拉屎」嘅主要功能，係透過全球定位系統，等用家可以知道附近邊度有廁所，仲會顯示埋嗰個有無廁格供應，今日網民仲二次創作，加入用家可以互送廁紙嘅功能，仲老作埋估值100億美金添。


大小二便、進食同瞓覺，都係人生必需品，唔少人都試過搵唔到廁所，或者入到廁所發現無晒廁格嘅慘痛經歷，所以小琴真心而且堅決地相信，如果真係有呢個App，相信估值100億美金都嫌小。


[小琴密語 email: piano@mingpao.com]