《馬丁路德金》 澳門冇得睇

【明報專訊】描述美國黑人民權領袖馬丁路德金如何公民抗命嘅電影《馬丁路德金：夢想之路》（Selma），主題曲《Glory》喺今屆奧斯卡贏得最佳原創歌曲獎。呢套戲前日喺香港上畫，不過一水之隔嘅澳門朋友就無咁好彩，澳門網媒《愛瞞日報》話，套戲無緣喺當地上映，有網民就質疑係政治審查。


Emily問過發行商驕陽電影，公關胡小姐確認《馬》唔會喺澳門上畫。佢話全澳門有3間戲院，但都無派代表睇試影，澳門UA就由香港UA代表睇試影，但睇完後點解無喺澳門上畫就唔清楚。胡小姐話，香港有40幾間戲院，18間有上呢套戲，算係中型發行，前日首日票房10萬4千元，加埋優先場6萬幾，累積票房16萬，成績算唔錯。


UA院線發言人話，無喺澳門放映《馬》不涉及政治考慮，話決定放映咩電影，會顧及商業考慮、營運成本同觀眾口味等因素，又話UA港澳共11間戲院都唔係間間有得睇，喺香港就有6間有得睇。